Украины Ерөнхийлөгч Володимир Зеленский Кремлийг галд автсан байдалтай дүрсэлсэн зургийн өмнө зогссон зураг нь Москвагийн бухимдлыг төрүүлжээ.
Энэ зургийг “Украин болон Оросын хооронд үргэлжилж буй дайнд Украины ялалтын бэлгэ тэмдэг болсон” гэж Зеленский үздэг юм байна.
Кремлийн хэвлэлийн төлөөлөгч Дмитрий Песков тус зургийн талаар “Энэ зураг нь тухайн хүн хэрхэн сэтгэж байгааг, дотоод байдал нь ямар байгааг харуулж байгаа байх” гэж мэдэгдсэн бөгөөд энэ зургийг Зеленскийд тохирохгүй гэж үзсэн байна. Москвад уг зургийг “Сэтгэцийн хувьд өвчтэй” гэж дүгнэжээ.
Гэсэн хэдий ч энэ зураг нь Украины эсэргүүцлийг илэрхийлэх хүчтэй бэлгэ тэмдэг хэвээр байгаа бөгөөд тус улс энэ зургийг уламжлалт тэмцэл болон итгэл найдварын бэлгэ тэмдэг болгосоор байна.
Энэ бол Гүржийн уран бүтээлч Сандро Антадзегийн 2022 онд зурсан бүтээл юм. Оросын түрэмгийллийн эсрэг Украины бүх нийтийн эсэргүүцэл, хүсэл зоригийг илэрхийлдэг бэлгэ тэмдэг. Түүний дүрсэлсэн Кремлийн галд автсан байдал нь зөвхөн Украины түүхэнд төдийгүй Гүржийн ард түмний сэтгэл зүйд ч тэргүүлэх байр суурь эзэлж байна гэж үздэг. Энэ зураг нь хоёр үндэстний нэгэн зорилгоо хэрэгжүүлэхийн төлөөх тэмцэл, ялалтын итгэл, хүчийг харуулж байгаа юм. Зеленский энэхүү зургийг 2023 оны арванхоёрдугаар сард шинэ жилийн мэндчилгээндээ ашигласан нь хоёр орны хоорондох нягт холбоо, хүндэтгэлийг бэлгэдэж байв.
Зурагны өнгө, уур амьсгал, сэтгэл хөдөлгөсөн өгүүлэмж нь зөвхөн нэг улс орны эсэргүүцлийг илэрхийлэхгүй, харин олон орны нэгдмэл байдлыг тэмдэглэсэн нь уран зураг болон улс төрийн хувьд өргөн утгатай юм.
Сандро Антадзе нь 1972 онд Тбилиси хотод төрсөн бөгөөд Гүржийн улс төр, нийгмийн нөхцөл байдлыг тусгасан олон бүтээлүүдтэй. Түүний бүтээлүүд нь улс орны онцлог, ард түмний сэтгэл хөдлөл, нийгмийн шилжилт хөдөлгөөнүүдийг гүн гүнзгий тусгадаг. Сандро Антадзегийн “Зүүд” бол зөвхөн уран бүтээл биш, энэ нь хоёр үндэстний тэмцэл, сэтгэл зүй, илэрхийллийг нэгтгэсэн хүчтэй бэлгэ тэмдэг болсон уран бүтээл юм.
Д.САРУУЛ
