Сүүлийн жилүүдэд дэлхий даяар архины зах зээлд шинэ хандлага хүчтэй мэдрэгдэж байна. 1997–2012 онд төрсөн Gen Z үеийнхэн архины хэрэглээг эрс багасгаж, архины уламжлалт салбарт ноцтой нөлөө үзүүлж эхэлжээ.
Судалгаагаар энэ үеийн залуус өмнөх үеийнхнээс илүү ховор, бага хэмжээтэй архи хэрэглэдэг, зарим нь бүр огт хэрэглэдэггүй болох нь тогтоогдсон байна. Эрүүл амьдралын хэв маяг, биеийн галбир, сэтгэцийн эрүүл мэндэд анхаарах үзэл, мөнгө хэмнэх хандлага зэрэг нь үүнд нөлөөлжээ.
Салбарын орлого буурчээ
Зарим эдийн засгийн шинжээчдийн тооцооллоор Gen Z үеийнхний бага хэрэглээ болон эдийн засгийн дарамттай холбоотойгоор архины дэлхийн зах зээлийн үнэлгээ 800 тэрбум ам.доллараар буурсан гэж үзэж байна.Ресторан, баарны архины борлуулалт дунджаар 18 хувиар буурсан нь ашигт ажиллагаанд томоохон цохилт өгч байгаа аж.
Гэвч архины салбар нурсангүй
Gen Z үеийнхэн бүгд архи уудаггүй биш. Зарим оронд энэ үеийн насанд хүрсэн хүмүүсийн архины хэрэглээ сүүлийн жилүүдэд тогтворжиж, зарим хэсэгт өсөлт үзүүлсэн байна. Салбарын борлуулалт буурахад зөвхөн Gen Z-ийн хэрэглээ бус, COVID-19-ийн дараах амьдралын хэв маягийн өөрчлөлт, эдийн засгийн хүндрэлийн нөлөө зэрэг олон хүчин зүйл нөлөөлжээ.
Шинэ чиглэл: Архигүй, бага спирттэй бүтээгдэхүүн
Үйлдвэрлэл, маркетингийн компаниуд шинэ үеийн сонирхолд нийцүүлэн архигүй болон бага спирттэй ундаа нэвтрүүлэх, эрүүл мэндийг илүү онцолсон сурталчилгаа явуулах болжээ.
Gen Z үеийнхэн архины хэрэглээг бууруулснаар архины салбарт өөрчлөлт авчирч, компаниудыг илүү эрүүл, хариуцлагатай чиглэлд шилжихэд түлхэц өгч байна. Салбар унаж байгаа биш, харин шинэ хэрэглэгчдийн үнэт зүйлд дасан зохицож буй шинэ үеийн шилжилт явагдаж байна гэж шинжээчид дүгнэж байна.
Ч.ДӨЛГӨӨН
Эх сурвалж: Business Insider, Financial Times, IWSR Drinks Market Analysis, OhBev,
Gallup, TRN USA
