АНУ-ын Ерөнхийлөгч Дональд Трамп дэлхийн худалдааны түншүүддээ шинэ, өргөн хүрээтэй тарифт арга хэмжээ авах болсноо зарлалаа. Эдгээр арга хэмжээнд “харилцан тарифт бодлого” багтаж байгаа бөгөөд Японоос импортлох бараа бүтээгдэхүүнд 24 хувийн татвар ногдуулна. Хятадын бараанд 34 хувь, Энэтхэгийн бараанд 26 хувь, Европын Холбооноос оруулж ирэх бүтээгдэхүүнд 20 хувийн татвар ногдуулахаар болжээ.
Трамп мэдэгдэл хийхдээ “Бүх улсаас орж ирэх импортод 10 хувийн доод түвшний татвар тогтооно. Харин хамгийн том худалдааны алдагдалтай орнуудын хувьд илүү өндөр тарифт бодлого хэрэгжинэ” гэв. Энэ бодлого нь дөрөвдүгээр сарын 9-нөөс хэрэгжиж эхлэх аж.
Японы Засгийн газар энэ арга хэмжээг “туйлын харамсалтай” гэж тодорхойлов.
Японы Ерөнхий сайд Ишиба Шигэру гадаад харилцаа, худалдаа, санхүү, хөдөө аж ахуйн салбарын өндөр албан тушаалтнуудтай уулзаж, Японы байр суурийг тодорхойлсон байна. Японы Эдийн засаг, худалдаа, аж үйлдвэрийн сайд Муто Ёжи АНУ-ын Худалдааны нарийн бичгийн дарга Ховард Лутниктэй цахимаар уулзаж, Токиогийн байр суурийг илэрхийлсэн байна. Тэрбээр уг шийдвэрийг “туйлын харамсалтай” хэмээн тодорхойлж, Япон АНУ-ыг чөлөөлөлт үзүүлэх талаар үргэлжлүүлэн лоббидохоо мэдэгдэв. Муто хариу тарифт арга хэмжээ авахаа яаран шийдэхгүй гэдгээ онцолж, Япон нөхцөл байдлыг хянуур үнэлж, хамгийн үр дүнтэй арга хэмжээг сонгохоо мэдэгдсэн байна.
Энэхүү шинэ тарифын бодлого АНУ-ын худалдааны уян хатан байдалд хэрхэн нөлөөлөх нь тодорхойгүй хэвээр байна. Япон зэрэг АНУ-ын томоохон худалдааны түншүүд энэ арга хэмжээнд хариу өгөх эсэх нь олон улсын эдийн засгийн харилцаанд чухал нөлөө үзүүлэх юм. АНУ-Японы харилцаанд худалдааны зөрчил үүсэх магадлалтай ба энэ нь Азийн бүс нутагт эдийн засгийн өөрчлөлтүүдийг авчрах боломжтой.
Ч.ДӨЛГӨӨН, Д.САРУУЛ
