Энэ жилийн ханш нээх өдөр 4 дүгээр сарын 4-нд буюу өнөөдөр тохиож байна. Энэ өдөр ханш нээж ичигсэд ичээнээсээ гарч, амьд байгалийн аливаа амьдрал сэргэж хорхой шавьж хөдөлдөг учиртай.
Ханш гэдэг үг нь ээлтэй сайн гэсэн утгатай. Монголчууд ханш нээх өдөр ичээнээсээ гарсан амьтдын байр байдал, өвс ургамал, тухайн өдрийн цаг агаарын байдлаар хаваршилт, зуншлага ямар байхыг шинжин тодорхойлж иржээ.
Ханш нээх өдөр өмнө зүгээс хур буувал өвс ургамал муу ургаж, үр тарианы ургац муудаж тааламжгүй болно хэмээн үздэг. Мөн амьтад хөдөлж, ичсэн тарвага зурам нүхнийхээ ам руу харж хэвтдэг байна. Энэ цагт булгийн ус задгайран оргилохоос гадна голын мөс ханзарна.
Цох хорхой гэнэт олширч энд тэндгүй гүйж харагдвал зун нь хуурай болно хэмээн зөгнөдөг ажээ. Хэрвээ шувуу гол мөрний усанд орвол дулаарахын шинж. Хаврын цас шоргоолжны үүрийн хойд хэсгээс эхэлж хайлбал зуншлага сайхан болж, өв ургамал тэгш ургахын тэмдэг хэмээн үздэг байжээ.
Ханш нээх өдрөөр талийгаачдын газрыг эргэх нь зохимжгүй гэдэг. Өнөөгийн монголчуудын дунд нийтлэг болсон “Ханш нээх” өдөр талийгаачдын газрыг эргэдэг ёс нь чухал ач холбогдолгүй, зарим тохиолдолд хор уршигтай ч байж болох тухай мэргэжлийн хүмүүс тайлбарласан байдаг.
О.ДҮҮРЭНЖАРГАЛ
