Японы Ичикавагийн амьтны хүрээлэнд төрсөн бяцхан сармагчин Панчи (Punch-kun) хэд хоногийн турш хүн төрөлхтөний анхаарлыг татсан билээ. Эх нь Панчиг төрүүлэнгүүтээ голсон юм.
Ийм зүйл сармагчингуудын дунд хааяа тохиолддог бөгөөд ялангуяа анхны удаа төрсөн эх сармагчинд туршлага дутсанаас болж моншоо голох тохиолдол байдаг.
Тиймээс Панчиг амьтны хүрээлэнгийн ажилтнууд тэжээж, халамжилж, эхийн дулааныг орлуулах зорилгоор ороангутинийн чихмэл тоглоом өгсөн нь түүний сэтгэлд тайвшрал өгч байсныг та бид харсан.
Гэвч хайр, халамж мэдрэлгүй ганцаардаж, бусдадаа дээрэлхүүлж, гадуурхагдаж байсан түүнийг нэгэн нас бие гүйцсэн сармагчин тэвэрчээ. Энэ бол түүний хувьд анхны халуун тэврэлтээ авсан тохиолдол боллоо.
Өмнө нь тэр ороангутинийн чихмэл тоглоомыг тэврэн тайвширч, хань татаж тэвэрдэг байсан бол одоо өөрийн зүйлтэйгээ жинхэнэ холбоо тогтоож, аюулгүй, хүлээн зөвшөөрөгдсөн мэдрэмжийг авч эхэлсэн байна.
Амьтны хүрээлэнгийн ажилтнуудын хэлснээр энэ нь Панчигийн нийгэмших үйл явцын чухал алхам бөгөөд түүний ганцаардалд цэг тавьсан найдвар төрүүлэм мөч болжээ.
Ч.ДӨЛГӨӨН
