Монголын үндэсний бөхийн холбооноос сар бүр уламжлал болгон зохион байгуулдаг Сумын цолтон болон бөхчүүдийн 128 дахь удаагийн барилдаанд 576 бөх уран мэх, авхаалж самбаа ёорин барилдсанаас Увс аймгийн Баруунтуруун сумын харьяат, “Хилчин” спорт хороо, ХЦ-0208 анги, Янжка’с Терафи ХХК-ий бөх, сумын начин Эрдэнэсүрэнгийн Ганболд гурав дахиа түрүүлж, Өмнөговь аймгийн Ноён сумын харьяат, Түвшин Наран ХХК-ий бөх, сумын заан Отгонбаатарын Учралбаяр анх удаагаа үзүүрлэв.
Гуравт Баянхонгор аймгийн Жинст сумын харьяат, сумын заан О.Дондов шалгарсан бол Тавд Завхан аймгийн Эрдэнэхайрхан сумын харьяат, Эв Монгол клубын бөх, сумын заан Д.Нарантулга, Дорноговь аймгийн Улаанбадрах сумын харьяат, Эв Монгол клубын бөх, сумын заан Н.Батсуурь нар шалгарлаа. Есөд Өмнөговийн заан С.Баярбаатар, Архангайн заан О.Цэрэнпунцаг, Завханы заан Б.Цэнд-Очир, Баян-Өлгийн заан Б.Жарданбек нар үлдэв.
“Үнэнч үзэгчдийн нэрэмжит дайчин барилдааны шагнал”-ыг Дорноговь аймгийн Улаанбадрах сумын заан Наранбатын Батсуурьд, “Уран барилдааны шагнал”-ыг сумын заан О.Дондовт улсын заан Ц.Гомбодоржийн охин Орхонсэлэнгэ, “Цолд ойрхон бөх”-ийн шагналыг сумын заан С.Баярбаатарт аймгийн заан Н.Жамьянсүрэнгийн ач охин, “Янжка’с терафи” ХХК-ийн захирал Д.Янжиндулам нар тус тус гардуулсан. олгосон юм.Дараагийн барилдаан ирэх долоо хоногийн бямба, ням гарагт Алтан цомын төлөөх шилдэг 8 багийн эхний тойргийн барилдаануудаар үргэлжилнэ.
МОНГОЛЫН ҮНДЭСНИЙ БӨХИЙН ХОЛБОО
