“Агнистын гэгээ” цувралын дуун хөрвүүлэгч П.БАДРАЛ: Бидний стресс бухимдлын дийлэнх хэсэг нь энэ амьдарч буй нийгэм, эргэн тойрноо жигшин зэвүүцэх сэтгэлээс үүддэг. Өөрсдийн зовлон, сэтгэл ханамжгүйн шалтгааныг нийгэмд тохож, гаднаас бурууг эрсээр. Цаг хугацаа, эрч хүчээ ийм бухимдалд үрэх тусам хүн өөрөө зэвэрч гунддаг.
Тэгвэл ертөнцийг өөрөөр харж, илүү гэгээлэг, урам зоригтой амьдрах аргыг багш бидэнд хэлж өгчээ: Бохир нийгэм, зовлонт ертөнц балчиг шавар шиг байг. Чи тэр дундаас бадамянхуа шиг дэлгэрч болно шүү дээ. Аливаа бэрхшээлийг өөртөө хөгжих боломж болгож ашигла. Хүн төрөлхтний сор болсон мэргэд, агуу бүтээлчид бүгд л хатуу цаг үе, хэцүү бэрх сорилтон дунд гэрэл гэгээгээ цацруулж иржээ.
Эзэн Чингис хаанаа бодоод үз. Өнчин өрөөсөн гээгдэж хоцорсон заяан дундаа л тэр үнэнч нөхдөө олж, өрлөг баатруудаа хурааж, их гүрнээ байгуулсан. Дарлал доромжлол, өширхөл хорсолд үйсэн амьдралаа гэгээрэл болгож хувиргасан Мял богдын түүх байна. Тийм учраас энэ байгаа орчин нөхцөл, цаг үеэ өөрт оногдсон “тэнгэрийн цаг” гэж ухаарч сэхээрье.
Эх сурвалж: Агнистын гэгээ
