Монголбанк өнгөрсөн дөрөвдүгээр сараас тэтгэврийн зээлийн олголтод хувь тогтоосон нь ахмадуудын дунд эсэргүүцэл бий болгосон юм. Арилжааны банкууд тэтгэврийн зээлээ зогсоож, зарим нь хувь тогтоосноор ахмадууд зээл авах боломжгүйд хүрээд байсан билээ. Ахмадууд өнгөрсөн зургадугаар сарын сүүлчээс Төрийн ордны баруун хаалган дээр суулт зарлаж наадам хүргэсэн. Олон өдөр үргэлжилсэн эсэргүүцлийн эцэст төв банк шийдвэрээ цуцалж, арилжааны банкууд 24 сар хүртэл тэтгэврийн зээлийг хэвийн олгож эхэлснээ мэдэгдсэн ч банкууд хэдхэн хоногийн дараа хэлснээсээ ухарч, ахмадуудыг хүнд байдалд оруулаад байгаа юм.
Ахмадууд нөхцөл байдлыг өөрчлөх сүүлчийн боломж жагсах хэмээн үзэж энэ сарын 10-нд буюу Хэлмэгдэгсдийн өдөр жагсана гэдгээ өнгөрсөн сард илэрхийлсэн.
Ахмадууд:
Тэтгэврийн доод хэмжээг 1,500,000 төгрөг болгох
Тэтгэврийн зээлийн хүүг 12 хувь болтол бууруулах
Зээлийн хугацааг 36 сар болгох, дараа сард нь нэг сарын зээл олгодог болгох
Давхар хүүнд өндөр шимтгэл тооцдог шударга бус байдлыг таслан зогсоох
Тэтгэврийн зээлийг хэрэглээний зээл биш онцгой зээлийн ангилалд оруулах хууль батлахыг шаардаж байгаа юм.
Жагсаалыг зохион байгуулж буй ахмадуудын төлөөлөл “Маргааш өглөө буюу 9 дүгээр сарын 10-ны 11:00 цагт Төрийн ордны баруун хаалган дээр цуглаж, шаардлагаа өгснөөр жагсаал төв талбай дээр үргэлжилнэ. Иймээс ахмадууд цагтаа ирээрэй. Бүгдээрээ шударга бусын эсрэг тэмцье. Жагсаалын шаардлагууд хэзээ биелнэ тэр хүртэл жагсаалаа зогсоохгүй. Эцсийг нь үзтэл тэмцэх болно. Биднийг хаваржин, зунжинг зовоолоо. Одоо хангалттай” хэмээлээ.
Д.САРУУЛ
