Хойд Солонгос өнгөрсөн сард далайд живсэн шинэ сөнөөгч онгоцоо амжилттай татаж гаргасан гэж мэдэгдлээ. Төрийн хэвлэлээр мэдээлснээр уг эвдэрсэн хөлгийг өөр усан онгоцны үйлдвэр рүү хуурай усан зогсоолд засварлуулахаар зөөх аж.
“Зургадугаар сарын эхээр сөнөөгчийн тэнцвэрийг сэргээсний дараа, пүрэв гаригийн үдээс хойш боомт дээр зогсоолоо,” хэмээн төрийн мэдлийн Солонгосын Төв Мэдээний Агентлаг (KCNA) мэдээлэв.
Planet Labs компанийн 6-р сарын 5-нд авсан хиймэл дагуулын зурагт живсэн онгоцыг татаж, осол болсон зогсоолоос хол, усан дээр хөвж буй нь харагджээ.
5000 тонн жинтэй энэ тэнгисийн сөнөөгч нь тус улсын хамгийн шинэ дайны хөлөг бөгөөд Хойд Солонгосын тэнгисийн цэргийн шинэчлэлийн бахархал болохоор төлөвлөгдсөн байв.
Гэвч тавцангаас түлхэх механизмд алдаа гарч хөлгийн сүүл хэсгийг ус руу гулсуулж, хөлгийн корпусыг гэмтээн, урд хэсгийг тавцан дээр гацахад хүргэжээ. Маргааш нь төрийн хэвлэл анх таамаглаж байснаас хохирол бага байсан гэж мэдээлж байв..
Тэр үед ослыг Чонжин хотод биечлэн үзсэн удирдагч Ким Жон Ун уг бүтэлгүйтлийг “гэмт хэрэг” гэж нэрлэж, дөрвөн хүнийг хариуцлагад татсан тухай Засгийн газар мэдэгджээ.
Ким Жон Ун засаг захиргааны албан тушаалтнуудад хөлгийн засварыг Зүүний Хөдөлмөрийн Намын 6-р сарын сүүлчийн бүгд хурлын өмнө яаралтай дуусгахыг үүрэгдэж, үүнийг “үндэсний нэр төрийн асуудал” гэж тодорхойлжээ.
Ч.ДӨЛГӨӨН
Эх сурвалж: CNN
