Японы Хөдөө аж ахуйн сайд Такү Это олон нийтийн бухимдлыг төрүүлсэн мэдэгдлийнхээ улмаас огцрох хүсэлтээ Ерөнхий сайд Шигэру Ишибад өнөөдөр гаргаж, хүсэлтийг нь хүлээн авсан талаар албаны эх сурвалж мэдээллээ.
Сайд Это энэ долоо хоногийн эхээр “Дэмжигчдийнхээ өгсөн бэлгийн ачаар би хэзээ ч будаа худалдаж авч байгаагүй” хэмээн хэлсний дараа иргэдийн хүчтэй шүүмжлэлд өртсөн юм. Японы иргэд цагаан будааны хомсдол, үнийн огцом өсөлттэй тулгарч буй үед ингэж ярьсан нь шүүмжлэл дагуулав.
Түүний энэхүү хэлсэн үг болон огцорсон үйл явдал нь аль хэдийнэ олон нийтийн дэмжлэг буурч буй Ерөнхий сайд Ишибагийн тэргүүлсэн цөөнхийн Засгийн газарт дахин нэг сорилт учруулж болзошгүй байна.
Ч.ДӨЛГӨӨН
Эх сурвалж: The Herald, NHK
