Майкрософт компанийн хамтран үүсгэн байгуулагч Билл Гэйтс 2045 он гэхэд 200 тэрбум ам.доллар буюу үндсэндээ бүх хөрөнгөө буяны үйлсэд зориулахаа мэдэгдлээ. Түүний хэлснээр энэ хандив нь эмзэг бүлгийнхний амь насыг аврах, амьдралыг нь сайжруулахад зориулагдана.
Гэйтсийн мэдээлснээр, энэхүү дэмжлэг нь тэжээлийн дутагдлаас шалтгаалсан эх, хүүхдийн эндэгдлийг бууруулах, халдварт өвчнөөс сэргийлэх, ядуурлыг арилгах зорилготой. Тэрээр сүүлийн 25 жилд Гэйтсийн сангаараа дамжуулан 100 тэрбум ам.доллар хандивласан бөгөөд энэ хэмжээг ирэх 20 жилд хоёр дахин өсгөнө гэжээ.
Мөн тэрээр АНУ, Их Британи, Франц зэрэг орнуудын буяны болон хөгжлийн тусламж буурч байгааг онцолж, хувийн сангуудын дэмжлэг хангалтгүй байгааг дурдсан юм.
Associated Press агентлагт өгсөн ярилцлагадаа Билл Гэйтс: Бидний хийж чадах зүйл хязгаартай хэдий ч хамгийн ихийг хийж байгаагаа харуулна” хэмээн онцоллоо. Гэйтсийн энэхүү шийдвэр нь дэлхий нийтийн анхаарлыг татаж, буяны үйл ажиллагаанд шинэ уур амьсгал оруулж болзошгүй байна.
Ч.ДӨЛГӨӨН
