УИХ-ын гишүүн Ж.Баярмаа чуулган дээр Ерөнхий сайдад хандан “Ерөнхий сайд аа, та амьдралаас хэтэрхий тасраад, вакумжаад байгаа юм биш үү” гэж сануулсан. Гэтэл Л.Оюун-Эрдэнэ түүний асуултад хариулах нь бүү хэл, юу гэж асуусныг нь ойлголгүй баахан дэмий юм ярьж, эмэгтэй хүнийг эрэгтэй хүний нэрээр хүртэл дуудаж, сүүлдээ микрофоноо хааж шидэхийг бид харсан. Түүний энэ үйлдлийг УИХ дахь АН-ын бүлэг эсэргүүцэж, гишүүнээс уучлал гуйхыг шаардаж, чуулганы хуралдаанаас завсарлага авсан.
Энэ бүхнийг харвал Ерөнхий сайд Л.Оюун-Эрдэнэ өөрийгөө шүүмжилсэн ганц үг ч сонсох чадваргүй болж вакумжжээ. Аливаа асуудалд улсын Ерөнхий сайдын хувиар биш хувь хүнийхээ үүднээс ханддагийн жишээ энэ.
Парламентыг бүхэлд нь чимээгүй болгож чадна гэж бодсон ч Ж.Баярмаа гишүүний амыг барьж чадсангүй. Тэгэх боломжгүй л дээ. АН өчигдөр мэдэгдэл хийснийг ард түмэн, олон нийт дэмжиж “Ардчилсан намын залуус жинхэнэ ардчилагчид шиг байна. Монголд ардчилал бөхөөгүй байжээ” гэж байна. Ж.Баярмаа гишүүний шударга үгэнд Ерөнхий сайд яагаад эмзэглэв гэхээр ерөөсөө л үнэнийг нь хэлсэнд байгаа юм. Л.Оюун-Эрдэнийн эргэн тойрныхон түүнийг худал, чихэр шиг үгсээр тархийг нь угааж, вакумжуулж өөрсдийнхөө утсан хүүхэлдэй болгожээ гэж харагдаж байна. Ухаант хүнд үнэнийг нь хатуу хэлбэл тэр дор нь гэмээ ухаарч зам мөрөө засахаар хичээдэг бол ухаангүй хүнд үнэнийг нь хэлбэл уурсаж, хорлохыг санаархдаг. Ийм л юм болсон.
Д.ГАНСАРУУЛ
Шог зургийг Гашуунбаатар
