АНУ-ын Ерөнхийлөгч Дональд Трамп сүүлийн үеийн мэдэгдэлдээ Хятадын дарга Си Жиньпинийг “сайн найз” хэмээн тодорхойлох боллоо. Энэ нь АНУ-Хятадын харилцаанд дахин уян хатан хандлага гаргаж болзошгүйг илтгэж байна. Трамп сүүлийн үед “Би Си Жиньпинтэй сайн харилцаатай. Тэр бол миний сайн найз. Маш хүчтэй удирдагч”хэмээн мэдэгдэх болсон нь олон нийтийн анхаарлыг татлаа. Энэ мэдэгдэл нь Хятадтай хийсэн худалдааны дайн, өндөр тарифуудын дараах нөхцөл байдалтай холбоотой гарсан бөгөөд Трамп мөн “Хятадын бүтээгдэхүүнд ногдуулсан тарифыг бууруулах талаар бид хэлэлцэж байна” гэж хэлсэн нь хоёр улсын эдийн засгийн харилцаанд нааштай хандлага бий болж буйг илтгэж байна. Трампын зүгээс өмнө нь ч Си Жиньпинийг “найз”, “хүчтэй удирдагч”, “хүндэтгэдэг хүн” хэмээн тодорхойлж байсан удаатай. Гэсэн ч түүний ийм мэдэгдлүүд нь зарим тохиолдолд улс төрийн ашиг сонирхлын хүрээнд хэлэгддэг хэмээн шинжээчид үзэж байна. АНУ-Хятадын харилцаа нь дэлхийн геополитикийн гол зангилаануудын нэг хэвээр байгаа бөгөөд хоёр орны удирдагчдын хувийн харилцаа нь гадаад бодлогын чиг хандлагад чухал нөлөө үзүүлсээр байна.
Ч.ДӨЛГӨӨН
Эх сурвалж: The Guardian, CNN
