Оскарын шагналт жүжигчин Гвинет Пэлтроу олон жилийн турш дагаж мөрдсөн хоолны дэглэмээ орхиж, дахин талх, гоймон, бяслаг зэрэг хүнсийг хэрэглэж эхэлснээ ярьжээ.
Тэрээр “Би нэг хэсэг макробиотик хооллолт руу хэт гүн орсон. Энэ бол маш эрүүл хооллох сонирхолтой үе байсан,” хэмээн ярьсан байна. Пэлтроу аав нь хоолойн хорт хавдартай болсноос хойш эрүүл мэнд, хоол хүнсийг гүнзгий сонирхож эхэлжээ. Түүний хэлснээр макробиотик дэглэм нь Японы уулын нутгийн уламжлалт хооллолттой төстэй бөгөөд загас, хүнсний ногоо, будаа зонхилдог, элсэн чихэр, сүүн бүтээгдэхүүн хэрэглэдэггүй гэнэ. “Би хэтэрхий хатуу баримталсан. Тэгэхэд би маш сайхан мэдрэмж авч байсан болохоор гэр бүл, найз нөхдөдөө заавал түгээх ёстой гэж боддог байлаа” хэмээн хуваалцжээ. Гэвч сүүлийн үед нас нэмэгдэхийн хэрээр бие махбодь, үрэвслийн асуудлууд үүсэж, нөхцөл байдал “илүү төвөгтэй” болжээ. Тиймээс нөхөр Брэд Фалчукын хамт хатуу дэглэмд орсон ч одоо бага зэрэг залхаж эхэлсэн тухайгаа ч илэрхийлжээ. “Би одоо дахин исгэлэн талх, жаахан бяслаг, гоймон идэж байна… ингэснээр би өөрийгөө илүү тайван, сэтгэл хангалуун мэдэрч байна,” хэмээн ярьсан байна.
Их Британийн Хоол зүйчдийн холбооны төлөөлөгч, мэргэжлийн хоол зүйч Прия Тью түүний энэ алхмыг эерэг хэмээн үнэлж “Ийм хатуу дэглэмээс гарч, илүү тэнцвэртэй хооллолт руу шилжиж буй нь сайшаалтай,” хэмээжээ.
Гвинет Пэлтроу Холливудын тайзнаас хэсэгтээ хөндийрөөд байсан ч тун удахгүй жүжигчин Тимоти Шаламетай хамт “Marty Supreme” нэртэй спорт, action төрлийн кинонд эргэн ирэхээр төлөвлөж буй ажээ.
Ч.ДӨЛГӨӨН
Эх сурвалж: ВВС
