2025 оны гуравдугаар сард Японы хэрэглээний үнийн индекс (CPI) жилийн дүнгээр 3.2 хувиар өсч, инфляци дөрөв дэх сардаа дараалан 3%-иас дээш түвшинд хадгалагдлаа. Энэ нь Төв банкны 2%-ийн зорилтот түвшинг гурав дахь жилдээ давж буйг харуулж байна.
Цагаан будааны үнэ өмнөх оны мөн үеэс 92.1 хувиар өсч, 1971 оноос хойших хамгийн өндөр өсөлт болжээ. Мөн өдөр тутмын хэрэглээний хүнс болох онгири (будаатай бөмбөлөг) 15 хувиар, ресторан дахь суши 4.7 хувиар үнэ нь өсчээ.
Энэхүү үнийн огцом өсөлтийн гол шалтгаан нь хэт халуун уур амьсгал, бордооны өртөг өссөн, аялал жуулчлалын эрэлт нэмэгдсэнтэй холбоотой гэж шинжээчид үзэж байна. Засгийн газар үнэ тогтворжуулах зорилгоор улсын нөөцөөс 210 мянган тонн будаа зах зээлд нийлүүлсэн ч хангалттай үр нөлөө үзүүлж чадахгүй байж болзошгүй байна.
Ийнхүү инфляцийн өсөлт нь Японы Төв банкны бодлогын хүүгийн шийдвэр, өрхийн худалдан авах чадвар, эдийн засгийн нөхцөл байдалд дарамт үзүүлсээр байна.
Ч.ДӨЛГӨӨН
Эх сурвалж: NHK
