Өнөөдөр Хятад улс АНУ-ын бараанд ногдуулах гаалийн тарифыг 84 хувиас 125 хувь болгож огцом нэмэгдүүллээ. Энэ нь АНУ-ын Ерөнхийлөгч Дональд Трампын зүгээс Хятадын бараанд ногдуулах тарифыг 145 хувь болгосонтой холбоотой хариу арга хэмжээ юм. Трампын шийдвэр нь бусад орнуудад 90 хоногийн тарифын хөнгөлөлт үзүүлж байгаа ч Хятадыг орхигдуулсан гэж Бээжин үзэж байна.
Хятадын Сангийн яам АНУ-ын энэ алхмыг “нэг талыг барьсан дээрэлхүү байдал” хэмээн нэрлэж, олон улсын худалдааны дүрэм зөрчсөн үйлдэл гэдгийг онцолжээ. Сангийн яамны мэдэгдэлд дурдсанаар, ийм өндөр тарифын улмаас АНУ-ын бараа бүтээгдэхүүн Хятадын зах зээлд өрсөлдөх чадваргүй болсон тул цаашид АНУ-ын тарифын өөрчлөлтөд Хятад хариу өгөх шаардлагагүй хэмээн мэдэгдсэн байна.
Дэлхийн санхүүгийн зах зээлд энэ мэдээ хүчтэй нөлөөлж, АНУ болон Европын хувьцааны зах зээл уналтад орсон бол, долларын ханш 2022 оноос хойших хамгийн доод түвшинд хүрсэн байна. Үүний зэрэгцээ алтны үнэ дээд хэмжээнд хүрч, аюулгүй валютууд болох Швейцарийн франк өсчээ.
Энэхүү хурцадмал байдал нь дэлхийн хоёр том эдийн засгийн харилцаанд гүн хямрал авчирч, олон улсын нийлүүлэлтийн сүлжээ, худалдааны тогтвортой байдалд ноцтой эрсдэл учруулж байгааг шинжээчид онцолж байна.
Ч.ДӨЛГӨӨН
Эх сурвалж: Reuters, The Guardian, Wall Street Journal
