2025 оны 3-р сарын 28-нд Мьянмарын төв хэсэгт болсон 7.7 магнитудын хүчтэй газар хөдлөлт олон хүний амь насыг авч одсон бөгөөд эмнэлгийн салбар хүнд байдалд оржээ.
Цэргийнхний мэдээлснээр одоогийн байдлаар 3354 хүн амь үрэгдэж, 220 хүн сураггүй алга болоод байна.
Нурсан барилгуудын дороос хүмүүсийг хайх аврах ажиллагаа үргэлжилж байгаа ч амьд үлдсэн хүмүүсийг олох магадлал бага болжээ.
Гамшигт өртсөн бүс нутгийн олон эмнэлэг эвдэрч, бүрмөсөн сүйрсэн учир шархадсан болон өвчилсөн хүмүүсийг эмчлэх боломж хомс байна.
Удаан үргэлжилж буй иргэний дайнд оролцож буй Мьянмарын цэргийн засаглал болон ардчиллыг дэмжигч сөрөг хүчнүүд газар хөдлөлтийн дараа түр гал зогсоох шийдвэр гаргасан ч Nippon Foundation-ын тэргүүн Сасакава Ёохэй “хоёр тал санамсаргүй мөргөлдөөнд өртөх магадлал хэвээр байна” гэж анхаарууллаа.
Тэрээр өмнө нь гал зогсоох гэрээг зуучилж байсан бөгөөд энэ удаа ч мөн “сэргээн босголтын ажлыг амжилттай хэрэгжүүлэхэд гал зогсоох хугацааг сунгах нь туйлын чухал” хэмээн мэдэгдсэн байна.
Ч.ДӨЛГӨӨН
Эх сурвалж: NHK
