Монгол Улс, Европын Холбоо (ЕХ)-ны Хүний эрхийн асуудлаарх ээлжит долоо дахь удаагийн яриа хэлэлцээг өчигдөр Улаанбаатар хотноо амжилттай зохион байгуулав.
Яриа хэлэлцээг Монголын талаас Гадаад харилцааны яамны Гэрээ, эрх зүйн газрын захирлын албан үүргийг түр орлон гүйцэтгэгч Ж.Соёлмаа, ЕХ-ны талаас ЕХ-ны Гадаад харилцааны албаны Ази, Номхон далайн орнуудын газрын Монголыг хариуцсан хэлтсийн дэд дарга Николетта Пустерла нар даргалж, Хууль зүй, дотоод хэргийн яам, Гэр бүл, хөдөлмөр, нийгмийн хамгааллын яам, Хүний эрхийн үндэсний комисс болон бусад холбогдох байгууллагын төлөөлөл оролцлоо.
Талууд ээлжит яриа хэлэлцээгээр сүүлийн үеийн үйл явдал, нөхцөл байдлыг дүгнэж, хүний эрхийн талаар баримтлах бодлого, үйл ажиллагааны тэргүүлэх чиглэлийн талаар харилцан мэдээлэл хийж, талуудын хооронд байгуулсан “Түншлэл, хамтын ажиллагааны тухай Монгол Улс, Европын Холбооны хоорондын хэлэлцээр”-ийг бүрэн хэрэгжүүлэх, тэр дундаа хүний эрх, хууль дээдлэх чиглэлээр хамтын ажиллагаагаа улам бэхжүүлэхийн төлөө байгаагаа дахин нотлов.
Мөн НҮБ-ын хүрээн дэх хоёр талын хамтын ажиллагаа, хэвлэлийн эрх чөлөө, жендерийн эрх тэгш байдал, эмэгтэйчүүдийг алагчлах бүх хэлбэрийг устгах хорооны ажиглалт, хүүхдийн эрх, уур амьсгалын өөрчлөлт, хүрээлэн буй орчин, агаарын бохирдол болон ЕХ-ны Хөнгөлөлтийн ерөнхий систем (GSP+)-ийн хүрээнд хүний эрхийн болон ОУХБ-ын конвенцын хэрэгжилт зэрэг өргөн хүрээтэй асуудлаар мэдээлэл, санал солилцов.
Монгол Улс, ЕХ цаашид хамтран хэрэгжүүлэх үйл ажиллагааны талаар санал солилцон, мөрөөр ажиллахаар тогтов.
