BBC: Мандалай “Алтан хот” байсан ч одоо эмгэнэл ханхалж байна
Мьянмарын хуучин хааны нийслэл Мандалай нь өмнө нь гялалзсан бурхадын “алтан хот” гэж нэрлэгддэг байв. Гэвч өнөөдөр тус хотын агаар үхлийн үнэртэй болжээ.
Өнгөрсөн баасан гаригт Мандалай хотын ойролцоо 7.7 магнитудын хүчтэй газар хөдлөлт болсноос хойш олон мянган цогцос бөөгнөрч, оршин суугчдын хэлснээр “бөөнөөр нь чандарлах” шаардлага тулгарсан байна.
Мьянмарын цэргийн эрх баригчдын мэдээлснээр газар хөдлөлт болон түүний дараах чичирхийлэлд өртөж, амь үрэгдсэн хүний тоо 2700-ыг давж, 4,521 хүн гэмтэж, хэдэн зуун хүн сураггүй алга болжээ.
Энэ тоо цаашид нэмэгдэх төлөвтэй байна. Тус улсын хоёр дахь том хотын иргэд хоол, ундны хомсдолоос болж гудамжинд хэвтэж байна. “Бөөнөөр чандарлаж байна” хэмээн ярьсан нэгэн оршин суугч газар хөдлөлтөд авга эгчээ алдсан аж. “Гэхдээ түүний цогцсыг хоёр хоногийн дараа, гуравдугаар сарын 30-нд л нуранги дундаас гаргаж авсан” гэж өөрийгөө зөвхөн “Ж” гэж нэрлэсэн 23 настай оюутан ярьжээ.
Тус улсын эмзэг дэд бүтэц, олон жилийн иргэний мөргөлдөөнөөс үүдэн аврах ажиллагаа удааширч байна. Үүнээс гадна, цэргийн эрх баригчид ихэвчлэн байгалийн гамшгийн бодит хэмжээг дарагдуулах хандлагатай байдаг. Аврагчид илүү олон нурангин дор үлдсэн хүмүүсийн цогцсыг олох тусам амиа алдсан хүмүүсийн тоо өсөх нь тодорхой байна.
Хотын олон оршин суугч айдаст автан, газар хөдлөлтийн дараах чичирхийллээс болж байшиндаа орж чадахгүй гудамжинд майханд хонож байна. Зарим нь бүр оромжгүй гудамжинд хоноглож байгаа аж.
Мягмар гаригт цэргийн удирдагч Мин Аун Хлайн телевизээр үг хэлэхдээ “Нас барагсдын тоо 3000-ыг давах магадлалтай” гэжээ. Харин АНУ-ын Геологийн судалгааны төвөөс “Газар хөдлөлтийн хэмжээ, байршлыг үндэслэн нас барагсдын тоо 10,000-ыг давах өндөр магадлалтай” гэж мэдээлсэн байна.
Ч.ДӨЛГӨӨН
Эх сурвалж: BBC
