Бельгийн баруун хойд хэсгийн Кортерэйк хотод 41 эмэгтэйг согтоож, хүчирхийлсэн хэрэгт таван эрэгтэйг баривчилсан талаар орон нутгийн цагдаагийн газар мэдээллээ. Баривчлагдсан хүмүүсийн гурав нь баарны менежерүүд байсан бөгөөд тэд 2021 оны 12-р сараас 2024 оны 12-р сар хүртэлх хугацаанд хохирогчдын уух зүйлд мансууруулах бодис хийж, улмаар бэлгийн хүчирхийлэл үйлдсэн хэрэгт холбогджээ.
Баруун Фландерс мужийн прокурорын газраас мэдээлснээр: Сэжигтнүүд хүчирхийллийн талаар хоорондоо ярилцаж, зохион байгуулсан байж болзошгүй. Хохирогч эмэгтэйчүүд согтууруулах ундаа, ихэвчлэн амаретто амттай шот уусны дараа ухаан мэдрэлгүй болж, үл таних газар эсвэл өөрийнхөө оронд сэрсэн. Уух зүйлд нь кетамин зэрэг мансууруулах бодис хольсон нь тогтоогджээ.
Прокурорын мэдээлснээр: Баривчлагдсан таван хэрэгтнийг бэлгийн хүчирхийлэл, хүчээр мансууруулах бодис уулгасан хэрэгт буруутгаж байна. Энэ хэргийн мөрдөн байцаалт үргэлжилж байгаа бөгөөд эрх баригчид хариуцлага тооцохоор ажиллаж байна гэжээ.
Ч.ДӨЛГӨӨН
Эх сурвалж: BBC
