Хайрцагтай хүн ирснээр Б.Энхбаярын хэлээд байсан “Халуухан хавар” эхэллээ. Үнэндээ улс төр дэх халуухан хавар биш, ердөө МАН-ын хоёр бүлэглэлийн хоорондох эрх мэдэл, албан тушаал, мөнгөний төлөөх тулааныг л хэлсэн үг байж дээ.
Нэг талаас “Хайрцагтай хүн” VS нөгөө талаас “Халуухан хавар”.
Хэн нь ч ялсан ард түмэнд ер хүртээлгүй, ашиггүй. Хэнийх нь ч талд орох гээд хэрэггүй. Учир нь эд нар бүгд МАН-ынхан! Эвлэрээд явчих эвгүй хүмүүс!
“Халуухан хавар”-ын талд бүх эрх мэдэл, хууль хяналтынхан бий. Хайрцагтай хүний талд 894 хуудас бүхий хайрцагтай материал, баримт байна.
Энэ “тулаан”-ы хажуугаар “Туулын хурдны зам төсөл” олон нийтийн эсэргүүцэлтэй хүчтэй тулгарч,
“Гэрэгэ таур”-ын 14 дүгээр давхрын дээрэм,
АН-ын бойкот,
УИХ-ын саажилт,
Шинэ хоёр сайдыг жинхлэх асуудал… гээд улс төр бужигнаж буй мэт боловч одоогоор Монголын улс төрд нэг их халуухан хавар болоод байгаа юм алга л. МАН-ынхан л дотроо давчаад халууцаад, түлхэлцээд байна.
Хаврыг ямар байхыг улс төрчид шийддэггүй. Ард түмэн ямар хавар байхыг мэддэг шүү, МАН-ынхаан.
Д.ГАНСАРУУЛ
