ӨНӨӨДӨР ТАМХИНЫ ЭСРЭГ ДЭЛХИЙН ӨДӨР
1988 онд Дэлхийн эрүүл мэндийн ассамблейн 32 дугаар чуулганаас тамхины хэрэглээ болон тамхины утаанаас үүдсэн хор хөнөөл, байгаль орчин, эдийн засагт үзүүлэх хор хөнөөл, гамшгаас хойч үеийнхнийг хамгаалах зорилгоор тавдугаар сарын 31-ний өдрийг “Тамхины эсрэг дэлхийн өдөр” болгон зарласан билээ. Энэ жил уг өдрийг “Тамхины үнэнийг илчилье” уриан дор тэмдэглэж байна.
Манай улсын нийт насанд хүрэгчдийн 24.2 хувь нь тамхи татдаг. 13-17 насныхны 25 хувь нь электрон тамхи татаж байна гэсэн судалгаа бий. 2017 онд УИХ Тамхины хяналтын тухай хуульд нэмэлт, өөрчлөлт оруулж, ахиц дэвшил гарсан хэдий ч цаашид хууль, эрх зүйн орчныг илүү сайжруулах шаардлага бий. Нийтийн эрүүл мэндийг сайжруулах зорилтын хүрээнд Улсын Их Хурлын даргын 110 дугаар захирамжаар “Тамхины хяналтын тухай хуулийн хэрэгжилттэй танилцаж, электрон тамхи, түүнтэй холбоотой асуудлаар холбогдох хуульд нэмэлт, өөрчлөлт оруулах шаардлагатай эсэхийг судлан, санал, дүгнэлт гаргах, шаардлагатай бол холбогдох хуулийн төсөл боловсруулах” үүрэг бүхий ажлын хэсгийг байгуулсан юм.
