Цэргийн шинжээчид Энэтхэг, Пакистаны хооронд сүүлийн үед болсон агаарын тулалдааныг анхааралтай судалж байна. Тус мөргөлдөөнд Пакистаны (Хятадад үйлдвэрлэсэн) J-10C сөнөөгч онгоцнууд болон Энэтхэгийн (Францад үйлдвэрлэсэн) Rafale онгоцнууд оролцсон бөгөөд энэ нь орчин үеийн 4.5 үеийн сөнөөгч онгоцнуудын бодит тулааны туршлага болохоор байна.
АНУ-ын албаныхны мэдээлснээр, Пакистаны J-10C онгоцнууд дор хаяж Энэтхэгийн цэргийн хоёр онгоцыг (түүний дотор нэг Rafale-ийг) унагасан гэж мэдэгджээ. Харин Энэтхэгийн тал онгоц алдаагүй гэж мэдэгдсэн бөгөөд террористуудын байрлалд амжилттай цохилт өгсөн хэмээн тайлагнасан байна.
Пакистан, Энэтхэгийн энэ сөргөлдөөний үед Хятадын үйлдвэрлэсэн PL-15E урт зайн агаараас агаарт харвах пуужингийн ашиглалт онцгой анхаарал татаж байна. Эдгээр пуужингийн үлдэгдэл Энэтхэгийн газар нутагт 100 км-ээс хол зайд олдсон нь байлдааны тулаан ихээхэн зайнаас өрнөсөн болохыг харуулж байна.
Энэтхэгийн талын зүгээс Кашмирт болсон террорист халдлагад хариу болгон “Синдоор ажиллагаа”-г эхлүүлсэн бөгөөд Пакистан болон түүний захиргаанд байгаа Кашмирын бүс нутагт бай цохилт өгсөн гэж мэдээлсэн. Үүний дараа Пакистан хэд хэдэн Энэтхэгийн онгоц, дроныг унагасан хэмээн мэдэгдэж, хоёр талын хооронд Лакшманы шугам дагуу их бууны гал солилцоо өрнөсөн байна.
Цөмийн зэвсэгтэй хоёр хөршийн хоорондох хурцадмал байдал олон улсын түвшинд ихээхэн түгшүүр төрүүлж байгаа бөгөөд дэлхийн томоохон гүрнүүд нөхцөл байдлыг намжаахыг уриалсаар байна.
Ч.ДӨЛГӨӨН
