Украины Ерөнхийлөгч Володимир Зеленский: Агаарын цохилтыг зогсоох, дор хаяж 30 хоногийн гал зогсоох саналдаа бид бат зогсож байна. Учир нь энэ бол дипломатын бодит боломж юм. Харин хариу өгөхгүй байгаа нь ОХУ бөгөөд дэлхий нийт үүнийг харж байна, тэдний хариу бол шинэ цохилтууд л байгаа. Энэ нь уг дайны эх үүсвэр хэн бэ гэдгийг маш тодорхой, илэрхий харуулж байна. Оросын түрэмгийлэл зогсох ёстой, тэд эцэст нь зогсоох л болно. Энэ бол цаг хугацааны асуудал. Дайн бол бүх хүнд гарз, тэр дундаа түрэмгийлэгч талд. Энэ дайны улмаас Орост тавигдах хориг арга хэмжээ нэмэгдсээр байна, эдгээр нь чухал хоригууд юм. Дэлхий нийтийн шударга ёс ч ажиллаж байгаа. Харамсалтай нь олон талаар удаан боловч хамгийн чухал нь зайлшгүй хэрэгждэг. Бид шинэчлэлтэд бэлтгэж, шударга ёсыг түргэтгэхээр ажиллаж байна.
Өнөөдөр Сирский жанжин хил орчмын Курск, Белгородын бүс нутгуудад өрнөж буй манай идэвхтэй ажиллагааны талаар мэдээлэл өгсөн. Бид Украины нутаг дэвсгэрийг дайсны хил орчмын үйл ажиллагаанаас хамгаалж байна. Өнөөдөр би бүх нэгтгэл, бүх цэрэг, бүх түрүүч, захирагч нарт талархал илэрхийлье, “Та бүхэнд талархаж байна, учир нь та бүхний тэсвэр хатуужил, жинхэнэ хүч чадал бол Украинд хамгийн их хэрэгтэй зүйл юм” гэж өнөө өглөө мэдэгдлээ.
Ч.ДӨЛГӨӨН
