Өнөө өглөө 7:35 цагт Ватикан хот дахь Домус Санкта Марта ордонд Ромын Католик сүмийн тэргүүн, Ромын Пап Франц таалал төгслөө. Тэрээр 88 настай байсан бөгөөд гашуудлын мэдээг Ватиканы хэвлэл мэдээллийн хэрэгслээр дамжуулан кардинал Кевин Фаррелл зарлав.
1936 онд Аргентины Буэнос-Айрес хотод Жорж Марио Берголио нэрээр төрсөн тэрээр 2013 онд Пап Бенедикт XVI огцорсны дараа анхны Латин Америк, мөн иезуит урсгалаас сонгогдсон анхны Пап болж байв. Пап Франц энэрэнгүй сэтгэл, орчин үеийн асуудлуудад анхаарал хандуулсан бодлогоороо танигдсан. Тэрээр уур амьсгалын өөрчлөлт, ядуурал, шашин хоорондын яриа хэлэлцээ зэрэгт онцгой анхаарч, сүм дотроо ч олон шинэчлэлийг эхлүүлсэн билээ.
2025 оны эхээр тэрээр уушгины хатгалгааны улмаас эмнэлэгт хэвтэж эмчлүүлж байсан бөгөөд түүний хувьд хамгийн сүүлчийн удаа олон нийтэд ил гарсан нь Улаан өндөгний баярын мөргөл байв.
Ч.ДӨЛГӨӨН
Эх сурвалж: The Guardian,Associated Press, TIME Magazine, Wikipedia
