Одон орончид К2-18b гэх нэртэй алслагдсан гаргийн агаар мандалд амьд биетээс үүсэх магадлалтай химийн нэгдэл илрүүлсэн тухай мэдээлэл тархаад байна. Энэхүү олдвор нь дэлхийээс 120 гэрлийн жилийн зайд орших уг гариг дээр амьдрал оршин байх боломжтой эсэх тухай шинэ хэлэлцүүлгийг эхлүүлэв.
Сүүлийн үеийн ажиглалтуудын үр дүнд тус гаргийн агаар мандалд диметил сульфид (DMS) илэрсэн гэх урьдчилсан мэдээлэл гарсан байна. Энэ нь дэлхий дээр зөвхөн амьд организм—ялангуяа далайн бичил замаг—буюу фитопланктонуудаас ялгардаг бодис юм. Иймээс тус бодисыг “биосигнатур”, өөрөөр хэлбэл амьдралын ул мөр гэж үзэх үндэслэлтэй хэмээн эрдэмтэд хэлж байна. К2-18b нь “Хайсиан” буюу уст давхаргатай, устөрөгчөөр баялаг агаар мандалтай, усан гадаргуутай байж болох гариг хэмээн таамаглагдаж байгаа бөгөөд улаан одой одны эргэн тойронд, амьдрал үүсэхэд тохиромжтой бүсэд эргэлддэг ажээ. Гэвч энэ олдвор нь маргаан дагуулж буй.
Нэгдүгээрт, DMS илрүүлэлт нь баттай биш, зөвхөн урьдчилсан, бага итгэлтэй үр дүн бөгөөд дахин давтан ажиглалт шаардлагатай.
Хоёрдугаарт, ийм бодисыг амьдрал бус, байгалийн өөр үйл явцаар үүсгэх боломжтой.
Гуравдугаарт, агаар мандлын загварчлал нарийн төвөгтэй тул багахан зөрүү ч дүгнэлтэд нөлөөлөх эрсдэлтэй юм. Гэсэн хэдий ч дэлхий дээрх амьдралаас өөр гариг дээр амьдрал оршин байж болзошгүй гэх таамаг хүчтэй дэмжлэг авч байгаа энэ үед дээрх олдвор нь асар их ач холбогдолтой. Энэ нь бидний амьдралын тухай ойлголтыг өргөжүүлж, одон орон судлалын шинэ эрин рүү хөтөлж мэдэх юм.
Ч.ДӨЛГӨӨН
Эх сурвалж: Sciencenews.org
