Reuters агентлаг болон Их Британид төвтэй Open Source Centre байгууллагын шинэ тайланд дурдсанаар, Хойд Солонгос Орос улсад ойролцоогоор 4–6 сая их бууны болон миномётын сум нийлүүлсэн байна. Энэхүү зэвсгийн нийлүүлэлт нь сүүлийн 1 жил хагасын турш үргэлжилсэн бөгөөд Украинд хийж буй дайнд ашиглагдсан гэжээ. Тэдний хийсэн судалгаа нь хиймэл дагуулын зургууд, сошиал медиа бичлэгүүд болон бусад эх сурвалжид үндэслэсэн байна.
Тайланд дурдсанаар: 2023 оны есдүгээр сараас 2025 оны гуравдугаар сар хүртэл Оросын далбаатай 4 хөлөг онгоц Хойд Солонгосын Ражин боомт руу нийт 64 удаа очжээ. Эдгээр хөлөг онгоцууд нийт 16,000 орчим чингэлэг зөөсөн ба энэ нь 4–6 сая сумтай тэнцэх хэмжээтэй. Зарим Оросын армийн анги нэгтгэлүүдийн хэрэглэж байсан бүх сум нь тэр өдөр Хойд Солонгосоос ирсэн байсан гэж Оросын цэргийн баримтад дурдсан байна. Цэргийн шинжээчид энэ дэмжлэг нь Оросын талд довтолгооны байр сууриа хадгалах, Украиныг тасралтгүй шахах боломж олгосон гэж дүгнэжээ.
Ч.ДӨЛГӨӨН
Эх сурвалж: NHK
