БНХАУ-ын дарга Си Жиньпин Вьетнам улсад хийсэн албан ёсны айлчлалынхаа үеэр хоёр орны хамтын ажиллагааг өргөжүүлж, АНУ-ын худалдааны бодлогыг шууд бусаар шүүмжиллээ.
Тэрээр Вьетнамыг “нэг талын дээрэнгүй үйлдэл”-ийг эсэргүүцэхэд БНХАУ-тай нэгдэхийг уриалсан байна. Си даргын энэхүү уриалга нь Трампын удирдлагын үед АНУ-аас БНХАУ-ын эсрэг авсан өндөр тарифын арга хэмжээнүүдтэй холбоотой бөгөөд Хятад улс бүс нутгийн хөршүүдтэйгээ харилцаагаа гүнзгийрүүлэхийг эрмэлзэж байгааг харуулж байна. Айлчлалын үеэр хоёр улс нийт 45 гэрээ байгуулсан бөгөөд эдгээр нь худалдаа, хиймэл оюун ухаан, тэнгисийн хамтарсан эргүүл, төмөр замын хөгжил зэрэг өргөн хүрээг хамарчээ. Вьетнам улс АНУ-тай бат бэх худалдааны харилцаатай, мөн сүүлийн жилүүдэд нийлүүлэлтийн сүлжээний шилжилтээс ихээхэн ашиг хүртсэн ч Хятадтай харилцахдаа тэнцвэрийг хадгалахыг эрмэлздэг. Си Жиньпиний энэ айлчлал нь бүс нутгийн орнуудтай харилцаагаа бэхжүүлэх Хятадын стратегийг харуулж байна.
Ч.ДӨЛГӨӨН
