Японы гамшгийн аврах хоёр дахь баг өчигдөр Мьянмарын хамгийн том хот болох Янгооны нисэх буудалд газардлаа. Энэхүү 37 хүний бүрэлдэхүүнтэй баг нь Мьянмарт саяхан болсон хүчтэй газар хөдлөлтийн улмаас эмнэлгийн тусламж шаардлагатай байгаа хүмүүст тусламж үзүүлэхээр иржээ. Мьянмарын цэргийн эрх баригчид мэдээлснээр, 7.7 магнитудын хүчтэй газар хөдлөлт төв нутгийг дайрсны улмаас 3600 гаруй хүн амь үрэгдэж, 130 гаруй хүн ор сураггүй алга болоод байна. Олон эмнэлэг эвдэрч, эмнэлгийн нөөц хомсдож буй нь нөхцөл байдлыг улам хүндрүүлж байгаа ажээ.
Нэгдсэн Үндэстний Байгууллагаас үзүүлсэн тооцоогоор 500,000 гаруй хүн шаардлагатай эмнэлгийн тусламж авч чадахгүй байдалд оржээ. Японы анхны эмнэлгийн баг энэ сарын 4-нөөс хойш хоёр дахь том хот Мандалайд түр эмнэлэг байгуулж, шархадсан болон өвчтэй хүмүүст эмчилгээ үзүүлж эхэлсэн юм. Харин шинээр ирсэн хоёр дахь баг ч мөн адил Мандалайн аврах ажиллагаанд нэгдэн оролцохоор төлөвлөж байна.
Багийн ахлагч Икэда Наоя: “Бид аль болох олон хүнд туслахыг зорьж байна” хэмээн мэдэгдлээ.
Ч.ДӨЛГӨӨН
Эх сурвалж: NHK
