Урин дулаан цаг ирж буйтай зэрэгцэн Улаанбаатар хотод цэвэрлэх байгууламжийн өмхий үнэр ч “айлчилж” байна.
Цэвэрлэх байгууламжаас гарч буй үнэр нь ихэвчлэн устөрөгчийн сульфид (H₂S), аммиак (NH₃) зэрэг хий агуулдаг. Эдгээр нь өндөр концентрацаар байх үед хортой нөлөө үзүүлж болзошгүй юм байна.
Цэвэрлэх байгууламжийн өихий, таагүй үнэр нь эрүүл мэндэд дараах сөрөг нөлөөтэй аж:
1. Амьсгалын замын асуудал – Харшил, амьсгалын замын үрэвсэл үүсгэж болзошгүй.
2. Нүд, арьсны цочрол – Зарим хүнд улайх, загатнах, хорсох шинж тэмдэг илэрч болно.
3. Толгой өвдөх, дотор муухайрах – Ялангуяа өндөр концентрацитай үед ийм нөлөө үзүүлдэг.
4. Удаан хугацааны нөлөө – Байнга өртвөл дархлааны тогтолцоонд нөлөөлөх, мэдрэлийн системд сөрөг нөлөө үзүүлэх аюултай.
Ийм аюултай агаараар та бид өдөр, шөнөгүй амьсгалж байна. Иргэд, байгууллагууд “өмхий”-нөөс эрүүл мэндээ хэрхэн хамгаалах вэ?
Гэр, ажлын байрандаа агаар шүүгч хэрэглэх – HEPA болон нүүрсэн шүүлтүүртэй агаар цэвэршүүлэгч ашиглавал доторх агаарын чанарыг сайжруулна.
Гадуур явахдаа маск зүүх – Ялангуяа N95, N99 зэрэг маск нь хорт хийг шүүхэд үр дүнтэй.
Гэрийн хаалга, цонхыг сайтар хаах – Өмхий үнэр ихтэй үед агаар оруулахгүй байхаар зохицуулах.
Тасалгааны ургамал нэмэх – Дотор ургамлууд буюу тасалгааны ургамал (алое, хлорофитум гэх мэт) агаарыг шүүж, хоргүйжүүлэхэд тустай.
Ч.ДӨЛГӨӨН
