Мьянмар дахь аймшигт газар хөдлөлтөөс үүдэлтэй амь насаа алдагсдын тоо 1600-гаас хол даваад байна. Зарим бүс нутагт амьд үлдсэн хүмүүс гартаа ямар ч багаж хэрэгсэлгүйгээр хайртай хүмүүсээ хайж, шавар, тоосгоор дүүрсэн эвдэрсэн барилгын балгасыг ухаж байгаагаа ярьжээ.
Багаж хэрэгсэл, төхөөрөмжийн хомсдол, харилцаа, сүлжээний доголдол, зам гүүрүүд эвдэрсэн нь амьд гарсан хүмүүсийг хайх ажиллагааг хүндрүүлсээр байна.
Газар хөдлөлт Мьянмарын хоёр дахь том хот болох Мандалайд ихээхэн сүйрэл авчирсан. 12 давхар орон сууцны барилга нурж, 30 цагийн дараа амьд хүн олсон нь аврагчдад ихээхэн урам зориг өгчээ. Гэвч “Улаан загалмай” нийгэмлэг “90 гаруй хүн одоо ч тус барилгын тууринд дарагдсан байж магадгүй” гэж мэдэгдсэн байна.
Ойрхон орон нутгийн нэг хороололд хүүхдийн цэцэрлэгийн барилга нурсан бөгөөд аврагчид 12 хүүхэд болон багшийн цогцос олжээ.
Ч.ДӨЛГӨӨН
Эх сурвалж: BBC, Reuters
