Зэвсэгт хүчний 123 дугаар ангийн хөгжимчин ахлах ахлагч Э.Даваажамц, Зэвсэгт хүчний 234 дүгээр ангийн гүүрчин аврагч дэд ахлагч Б.Буянхишиг нар нь багийн бүрэлдэхүүний хамт Хэт холын марафон гүйлтийг эх орныхоо дөрвөн зүгт байрлах хилийн соёмбот баганыг Монгол Улсын төв цэгтэй холбосон 5000 километрийг 99 хоногт багтаан гүйхээр төлөвлөжээ.
Батлан хамгаалах салбар Зэвсэгт хүчний үйл ажиллагааг олон нийт хүүхэд залуус иргэдэд сурталчлах цэрэг эх оронч хүмүүжлийг төлөвшүүлэх иргэний цэргийн харилцааг бэхжүүлэх зорилгын хүрээнд ийнхүү гүйх юм байна. Энэ нь Зэвсэгт хүчний нэр хүнд, амжилтын буухиаг дархлах онцгой ач холбогдолтой юм.
Төслийн хүрээнд:
•Монгол Улсын баруун захын цэг болох Цаст даваанаас зүүн захын Модот хамар хүртэл 11 аймаг, 40 сумын нутгаар дамжин 3280 км замыг 63 хоногийн дотор гүйж дуусгах:
•Хойд захын цэг болох Монгол Шарын даваанаас өмнөд захын Орвог гашууны Бор толгой хүртэл 5 аймаг, 23 сумын нутгаар дамжин 1720 км замыг 36 хоногийн дотор гүйж дуусгах төлөвлөгөөтэй байгаа ажээ.
О.ДҮҮРЭНЖАРГАЛ
