Монгол Улсын Ерөнхийлөгч У.Хүрэлсүх хаврын чуулганы нээлтэд үг хэллээ.
У.ХҮРЭЛСҮХ: Бурханы сургаальд нэг сайхан үг байдаг юм аа. “Хэрвээ чи зовлонгоос ангижиръя гэвэл зовлонгийн шалтгааныг ол” гэж. Бидэнд зовлон байна. Тэр зовлонгийн шалтгаан нь ёсзүйгүй, сахилга хариуцлагагүй байдал гэж үзэж байгаа юм. Жишээ нь, Улсын төсвийг батлахад бид ямар хариуцлагагүй ханддагийг өөрсдөө мэдэж байгаа. Сүүлдээ төрийн тэргүүн хүртэл хориг тавьж байсан гэдгийг та бүхэн мэдэж байгаа. Тиймээс төрийн албаны бүх шатанд сахилга, хариуцлага, ёсзүйг дээдэлж, хариуцсан ажилдаа эзний ёсоор хандаж, хийрхсэн улс төр, хэрүүл тэмцлээс ангид байж, бүх шатны төрийн байгууллагын хүнд суртал, бүтээмжгүй байдлыг халж, иргэндээ ээлтэй, нийгэмдээ үлгэр дуурайлалтай төрийн албыг бэхжүүлэх явдал нэн шаардлагатай байна. Төрийн бүх шатанд хариуцлагын тогтолцоог чангатгаж, хариуцлага алдсан, ёсзүйн зөрчил гаргасан аливаа албан тушаалтанд зохих хариуцлага тооцох зарчмыг баримтлан ажиллах нь зүйтэй. Төрд зүтгэж буй хэн ч боловч төгс сайн мэдлэггүй ч, төгөлдөр сайн ёс суртахуунтай байх учиртай юм аа.
