Гадаад харилцааны сайд Б.Батцэцэг: Цөмийн зэвсгийг бүрэн устгах олон улсын өдрийг тохиолдуулан зохион байгуулагдсан өндөр түвшний уулзалтад оролцлоо. Уулзалтын үеэр Монгол Улс олон улсын энх тайван, аюулгүй байдлыг хангахын төлөөх хүчин чармайлтыг тууштай дэмжиж ирснийг тэмдэглээд, манай улсын цөмийн зэвсэггүй статус нь цөмийн зэвсгээс ангид дэлхий байгуулах үйл хэрэгт оруулж буй бодит хувь нэмэр болохыг онцлон илэрхийллээ.
Энэхүү уулзалтад НҮБ-ын Ерөнхий нарийн бичгийн дарга Антонио Гутерреш, Ерөнхий Ассамблейн 80 дугаар чуулганы дарга Анналена Бэербок болон 100 орчим гишүүн улсын төлөөлөгч оролцож, цөмийн зэвсгийн бодит аюул занал, түүнийг бүрэн устгах зайлшгүй шаардлагын талаар байр сууриа солилцов.
