Сүүлийн саруудад Непалын Gen Z үеийнхэн авлига, улс төрийн элитүүдийн эсрэг өрнүүлсэн эсэргүүцлийн хөдөлгөөндөө тоглоомын чат апп болох Discord-ийг гол индэр болгон ашиглаж байна.
Discord дээр тэд хаалттай серверүүд үүсгэн, жагсаал, эсэргүүцлийн арга хэмжээгээ төлөвлөж, уриа үг гаргаж, логистик зохион байгуулалт хийж, санал асуулга хүртэл явуулсан байна.
Энэ нь тэдэнд уламжлалт олон нийтийн сүлжээнээс илүү ойр, шуурхай харилцах боломж олгожээ.
Мөн Discord-ээр дамжуулан удирдагч сонгох, санал асуулга явуулах зэрэг илүү “ардчилсан” процесс өрнөсөн нь онцлог. Гэхдээ сул тал ч гарсан бөгөөд санал хураалтад Непалын иргэн бус хүмүүс оролцсон тохиолдол илэрч, энэ нь “ардчиллын процесс хакердах боломжтой” гэсэн маргааныг дагуулжээ.
Энэхүү цахим зохион байгуулалтын үр дүнд өрнөсөн өргөн хүрээний эсэргүүцэл нь улс төрийн өөрчлөлтийг авчирсан бөгөөд хуучин элитүүдийн нөлөөг сулруулж, түр Ерөнхий сайдаар шударга ёсны төлөөлөлд тооцогддог Сушила Карки томилогдоход хүргэв.
Ийнхүү Discord нь зөвхөн тоглоомчдын чат биш, харин Непалын залуусын хувьд жагсаал, улс төрийн хөдөлгөөний виртуал штаб болон хувирсан нь олон улсын анхаарлыг татаж байна.
Ч.ДӨЛГӨӨН
