Миний 90 насны төрсөн өдөр тохиож байна. Энэ өдрийг тохиолдуулан дэлхийн олон улс оронд, тэр дундаа Төвдийн олон нийтийн дунд баяр тэмдэглэж, сайн санааны арга хэмжээнүүд зохион байгуулж байгааг би талархан сонслоо. Та бүхэн энэхүү боломжийг ашиглан энэрэл, халуун сэтгэл, бусдын төлөө чин үнэнч сэтгэлийг сурталчлан түгээж байгаад би чин сэтгэлээсээ талархаж байна.
Би өөрийгөө ердөө л энгийн нэгэн буддын лам гэж үздэг бөгөөд ер нь төрсөн өдрөө онцлон тэмдэглэдэггүй. Гэхдээ та бүхний зүгээс ийм арга хэмжээнүүдийг санаачлан зохион байгуулж буй тул өөрийн зүгээс хэдэн санаа хуваалцъя гэж бодлоо.
Материаллаг хөгжил чухал ч, сэтгэлийн амар амгаланг олж авах нь үүнээс илүү чухал юм. Үүнийг сайн сэтгэл, энэрэнгүй хандлагаар л бий болгож чадна. Энэ бол зөвхөн гэр бүл, ойр дотны хүмүүстээ хандах хандлага биш, хүн бүрт энэрэл нигүүлсэлтэй хандах тухай юм. Ийм хандлагаар л бид илүү сайхан, амар тайван дэлхийг бий болгож чадна.
Хувь хүний хувьд би амьдралынхаа туршид дараах үндсэн зарчмуудад үнэнч байж ирсэн: хүний үндсэн үнэ цэнийг дэмжих, шашин хоорондын эв нэгдлийг бэхжүүлэх, хүний оюун ухаан, сэтгэлийн хөдөлгөөнийг тайлбарласан эртний Энэтхэгийн мэргэдийн ухааныг түгээн таниулах, мөн Төвдийн соёл, өв уламжлалыг хамгаалах. Энэхүү соёл нь сэтгэлийн амгалан, энэрэл нигүүлслийг эрхэмлэдгээрээ өнөөгийн дэлхий дахинд үнэтэй хувь нэмэр оруулах чадалтай юм.
Би өдөр бүрийн амьдралдаа Будда болон Энэтхэгийн их мэргэдийн сургаалиас урам авч, тэдгээрийн заасан ухаанаар шийдэл, урам зориг олдог. Тухайлбал, Шантидева гэгээний дараах мөрийг би амьдралынхаа чиг шугам болгон дотоод сэтгэлдээ тунхагладаг:
Огторгуй орших цагт,
Омогшиж яваа амьтад орших цагт,
Тэр цаг хүртэл би оршиж,
Энэ ертөнцийн зовлон шаналлыг арилгах болтугай.
Миний төрсөн өдрийг тохиолдуулан сэтгэлийн амар амгалан, энэрэл нигүүлслийг өөртөө төлөвшүүлэхээр хичээж буй та бүхэнд гүн талархал илэрхийлье.
Таши дэлэг. Залбирлаа өргөе.
Далай Лам
2025 оны 7 сарын 5
