ОХУ-ын Ерөнхийлөгч Владимир Путины Украинтай шууд яриа хэлэлцээ хийх санал одоогоор тодорхой бус байдалтай байна. Хоёр улс гал зогсоох хэлэлцээрт хүрэх үйл явцын талаар санал зөрөлдсөөр байна.
Украины Ерөнхийлөгч Володимир Зеленский Путиныг Туркт хүлээж байна хэмээн мэдэгдсэн нь Путины Истанбул хотод шууд уулзалт хийх саналыг хариу болгожээ. Гэвч Путины ням гаригт тавьсан саналдаа өөрөө биечлэн очно гэсэн утга агуулаагүй бололтой.
Кремлийн хэвлэлийн төлөөлөгч Дмитрий Песков Зеленскийн мэдэгдэлд даваа гаригийн хэвлэлийн хурлын үеэр хариу өгсөнгүй.
Украин улс ОХУ-тай яриа хэлэлцээ эхлүүлэхээс өмнө даваа гаригаас эхлэн 30 хоногийн хугацаатай гал зогсоохыг шаардсан байна. Гэвч ОХУ-ын Батлан хамгаалах яам тухайн өдөр өөрийн цахим хуудсаар “тусгай цэргийн ажиллагаа” үргэлжилж байгааг зарласан юм.
Мөн Украины Гадаад хэргийн сайд Андрий Сыбиха өөрийн цахим хуудсаар мэдэгдэл гаргаж, ОХУ гал зогсоох уриалгыг бүрэн үл тоож, Украины байрлалууд руу дайралт үргэлжлүүлсээр байгааг Украины Зэвсэгт хүчний ерөнхий командлагчийн тагнуулын мэдээлэлд үндэслэн мэдээлжээ.
Эх сурвалж: NHK
