Энэтхэг, Пакистан хоёрын хоорондын хурцадмал байдал дахин дээд цэгтээ хүрч, хоёр тал агаарын цэргийн баазууд руу пуужин харвасан талаар харилцан мэдэгдэв.
Энэтхэгийн зүгээс 5-р сарын 7-нд “Синдоор” нэртэй цэргийн ажиллагааг эхлүүлэн Пакистаны нутаг дэвсгэрт байрлах террорист бүлэглэлүүдийн байрлалд пуужингийн цохилт өгсөн гэж мэдэгдсэн. Энэхүү ажиллагаа нь Кашмирт гарсан халдлагад 26 энгийн жуулчин амь үрэгдсэний дараа явагджээ.
Үүний хариуд Пакистан улс “Буньян-ун-Марсоос” нэртэй эсэргүүцлийн ажиллагаа явуулж, Энэтхэгийн Пенжаб болон Жамму ба Кашмир муж дахь цэргийн байгууламжуудыг пуужингаар харвасан байна. Цохилтуудын улмаас Пакистанд 33 энгийн иргэн амь насаа алдсан бол Энэтхэгт нэг төрийн албан хаагч амь үрэгджээ. Иргэний дэд бүтцэд ч мөн хохирол учирсан байна.
Олон улсын хамтын нийгэмлэг, тэр дундаа АНУ, Саудын Араб болон G7-ийн орнууд нөхцөл байдлыг намжааж, хэлэлцээрийн ширээний ард суухыг талуудад уриалж байна. Хоёр тал өдгөө албан ёсоор дайн зарлаагүй ч, байдал туйлын эмзэг хэвээр байна.
Ч.ДӨЛГӨӨН
