Энэтхэг улс Пакистан болон Пакистаны хяналттай Кашмир дахь есөн байршилд цэргийн цохилт өгсөн тухайгаа зарлалаа. Энэхүү ажиллагаа нь Энэтхэгийн Батлан хамгаалах яамны мэдээлснээр “Энэтхэгийн эсрэг зохион байгуулсан террорист халдлагын төлөвлөлт, чиглүүлэлт хийгддэг террорист дэд бүтцүүдийг” онилсон байна.
Пакистаны армийн төлөөлөгч орон нутгийн хэвлэлд мэдэгдэхдээ Энэтхэгийн тал Пакистаны гурван байршил руу пуужингийн довтолгоо хийсэн гэж мэдээлжээ. Талуудын хоорондын хурцадмал байдал өнгөрсөн сард Энэтхэгийн хяналттай Кашмирт болсон террорист халдлагын дараагаар нэмэгдсэн. Тус халдлагад 26 хүн амиа алдсан бөгөөд тэдний дийлэнх нь жуулчид байжээ. Энэтхэг халдлагад Пакистаныг холбоотой гэж буруутган, хариу арга хэмжээ авах талаар сануулсан бол Пакистан уг зүйлийг эрс үгүйсгэсэн юм.
Ч.ДӨЛГӨӨН
Эх сурвалж: NHK
