АНУ-ын Харвардын их сургууль Трампын засаг захиргаанаас тавьсан шаардлагуудыг эрс эсэргүүцэж, бараг 9 тэрбум ам.долларын холбооны санхүүжилтээ алдах эрсдэлтэй тулгараад байна.
Энэхүү шаардлагад олон нийтийн эсэргүүцэл дагуулсан зүйлс багтсан бөгөөд үүнд:
Нас, хүйс, үндэс угсаанд тулгуурласан олон янз байдал, эрх тэгш байдал, хамрагдал (DEI) хөтөлбөрүүдийг зогсоох,
Элсэлтийн бодлогыг зөвхөн “мерит”-д (амжилт, шалгуур үзүүлэлт) тулгуурлан өөрчлөх,
Сургуулийн доторх жагсаал цуглаан дээр амны хаалт зүүхийг хориглох,
Цагаачлалын албадтай идэвхтэй хамтран ажиллах,
Сургуулийн удирдлагад багш нарын нөлөөллийг бууруулах зэрэг оржээ.
Харвардын ерөнхийлөгч Алан Гарбер уг шаардлагууд нь АНУ-ын Үндсэн хуулийн 1-р нэмэлт заалтад заасан үг хэлэх эрх чөлөө болон их сургуулийн хараат бус байдалд халдаж байна гэж мэдэгдэв.
“Харвард улс төрийн дарамтад автахгүй”
Тэрээр: “Харвард улс төрийн дарамтад автахгүй” хэмээн мэдэгдсэн юм.Энэ асуудалд хариу арга хэмжээ болгон Харвард хуульчдын баг ажиллуулж, шаардлагуудыг шүүхийн шатанд оруулахад бэлэн байна. Сургуулийн 53.2 тэрбум ам.долларын хөрөнгөтэй төдийгүй, саяхан 750 сая ам.долларын бонд гаргасан нь холбооны санхүүжилт тасарсан тохиолдолд үйл ажиллагаагаа үргэлжлүүлэх зорилготой гэж үзэж байна.
Зарим их, дээд сургууль холбооны санхүүжилтээ сэргээхийн тулд ижил төстэй нөхцлүүдийг хүлээн зөвшөөрсөн бол, Харвард ийм алхам хийхээс татгалзаж, тусгаар тогтнолоо хамгаална гэдгээ илэрхийлсэн байна.Энэхүү зөрчил нь АНУ-д боловсролын байгууллагуудын эрх чөлөө, холбооны хяналт зэрэг асуудлаар өрнөж буй өргөн хүрээний маргааныг дахин ил болгож байна.
