Энэ сарын 12-нд АНУ-ын Ерөнхийлөгч Дональд Трамп ухаалаг утас, зөөврийн компьютер, сервер, санах ой зэрэг гол хэрэглээний технологийн бүтээгдэхүүнийг шинэчилсэн өндөр тарифуудаас чөлөөлөх шийдвэр гаргалаа.
Энэхүү алхам нь Apple, Dell, Nvidia зэрэг Хятадад үйлдвэрлэлтэй компаниудад дэмжлэг үзүүлэхийн зэрэгцээ хэрэглэгчдийн худалдан авалтын ачааллыг бууруулах зорилготой юм. Эдгээр бүтээгдэхүүнд өмнө нь 125% хүртэлх тарифаар татвар ногдуулахаар төлөвлөж байсан ч, шинэ шийдвэрийн үр дүнд iPhone зэрэг үнэтэй техник хэрэгслийн үнэ өсөхөөс сэргийлэх боломж бүрдэв.
Гэхдээ АНУ Хятадаас хамааралтай байдлыг бууруулах бодлогоо үргэлжлүүлж, дотоодын үйлдвэрлэлд ихээхэн хөрөнгө оруулалт хийж буй. Apple компани гэхэд л 500 тэрбум ам.долларыг АНУ-ын үйлдвэрүүдэд зарцуулах, 20,000 ажлын байр шинээр бий болгохоор амласан байна. Ирэх саруудад хагас дамжуулагчийн импортын асуудлаар шинэ тарифууд хэлэлцэх төлөвтэй байгаа тул технологийн салбарын хувьд энэ чөлөөлөлт нь түр зуурын “амьсгаа” болж магадгүй хэмээн шинжээчид үзэж байна.
Ч.ДӨЛГӨӨН
Эх сурвалж: Investor’s Business Daily, New York Post, Business Insider
