Нийгмийн үзүүлэлтийн түүвэр судалгааны хүрээнд нярай болон бага насны хүүхдийн хооллолтын талаарх мэдээлэл цуглуулдаг.
НҮБ-ын Хүүхдийн Сан болон ДЭМБ-аас нярай хүүхдийг төрснөөс нь хойш 1 цагийн дотор амлуулах, 0-6 сар хүртэл нь эхийн сүүгээр дагнан хооллох, 0-2 нас хүртэл болон түүнээс цааш үргэлжлүүлэн хөхүүлэхийг зөвлөмж болгодог юм.
Нярай болон бага насны хүүхдийг ялангуяа 0-2 нас хүртэлх эгзэгтэй хугацаанд зөв зохистой хооллосноор тэдний эсэн мэнд амьдрах боломжийг нэмэгдүүлж, өсөлт хөгжлийг нь дэмждэг талаар ДЭМБ зөвлөдөг. Сүүлийн 10 жилийн байдлаар харвал улсын хэмжээнд 3 хүүхэд тутмын 1 нь төрсний дараа 1 цагийн дотор ангир уургаа амлаж чадахгүй байна.
Энэ үзүүлэлт хот, хөдөөгийн хүүхдүүдийн хувьд ялгаатай байгаа юм. 2023 оны судалгааны үр дүнгээр энэ үзүүлэлтийн хувьд хотод хөдөөнөөс 9 нэгж хувиар бага байна. Мөн 0-5 сартай 2 хүүхэд тутмын 1 нь эхийн сүүгээр дагнан хооллож байна. Зохистой байдлаар хооллож байгаа 6-23 сартай хүүхдийн хувь өмнөх судалгаануудтай харьцуулахад буурчээ.
Тухайлбал 2023 оны судалгааны үр дүнгээр зохистой байдлаар хооллож буй 6-23 сартай хүүхэд хөдөөд 16 хувь байгаа нь хотоос 1.8 дахин бага үзүүлэлт.
