АНУ-ын Ерөнхийлөгч Дональд Трампын шинэчилсэн худалдааны тарифийн бодлогын эсрэг нэр нөлөө бүхий хөрөнгө оруулагч, тэрбумтан Билл Акман анхааруулга гаргажээ. Тэрбээр уг бодлого нь улс орныг “Өөрсдийн гараар бий болгосон эдийн засгийн цөмийн өвөлд” хүргэж болзошгүй гэж мэдэгдэв.
Хедж сангийн удирдагч Акман өмнө нь Трампыг дэмжиж байсан ч, шинэ тарифийн бодлогын эрсдэлтэй холбогдуулан ерөнхийлөгчийг тарифийн хэрэгжилтийг гурван сараар хойшлуулж, улсуудтай дахин хэлэлцээр хийх боломж олгохыг уриалжээ.
Акманы санааг JPMorgan Chase компанийн захирал Жэйми Даймон ч мөн дэмжиж, тарифууд нь америкчуудын хувьд үнэ өсөх шалтгаан болж магадгүйг онцолсон байна. Гэсэн хэдий ч ерөнхийлөгч Трамп өөрийн шийдвэрийг хамгаалж, “Заримдаа асуудлыг засахын тулд эм уух шаардлагатай” хэмээн мэдэгдсэн. Тэрбээр энэхүү арга хэмжээ нь АНУ-д шинэ ажлын байр, хөрөнгө оруулалтыг авчрах хүлээлттэй байгааг илэрхийлжээ. Гэвч эдийн засагчид үнийн өсөлт, худалдааны дайн дэгдэх эрсдэлтэйг анхааруулж байгаа бөгөөд Европ, Азийн хөрөнгийн зах зээлд сөрөг нөлөө үзүүлж, хувьцааны ханш унасаар байна.
Ч.ДӨЛГӨӨН
