Disney болон Pixar студиуд “Коко” хүүхэлдэйн киноны хоёрдугаар ангийг бүтээж эхэлснээ зарлалаа. Нээлтээ 2029 онд хийхээр төлөвлөжээ. Энэ тухай Disney-ийн Гүйцэтгэх захирал Боб Айгер компанийн жилийн хувьцаа эзэмшигчдийн уулзалтын үеэр мэдэгдсэн байна. Эхний “Коко” кино нь шилдэг анимэйшн кино болон “Remember Me” дуугаар Оскарын хоёр шагнал, Алтан бөмбөрцөг болон BAFTA шагналуудыг хүртэж байсан.
Кино нь 12 настай Мигель хүүгийн хөгжмийн мөрөөдөл болон гэр бүлийнхээ түүхийг нээхээр Үхэгсдийн оронд хийсэн аяллын тухай өгүүлдэг.
“Коко 2” киног эхний ангийн найруулагч Ли Ункрих болон хамтран найруулагч Адриан Молина нар удирдан ажиллах бөгөөд продюсерээр Марк Нильсен ажиллах болно.
Айгерийн хэлснээр, кино нь одоогоор эхний шатандаа байгаа ч инээдэм, сэтгэл хөдлөл, адал явдлаар дүүрэн байх болно гэжээ. Энэхүү шинэ бүтээл нь үзэгчдийн дунд өндөр хүлээлт үүсгэж байгаа бөгөөд цаашид дэлгэрэнгүй мэдээллийг хуваалцахаа амласан байна.
