Есөн сар сансарт гацсан хоёр сансрын нисгэгч дэлхийд буцаж ирсэн билээ.
НАСА-гийн сансрын нисгэгчид Барри Бутч Уилмор, Сунита Суни Уильямс нар энэ сарын 18-нд дэлхийд амжилттай газардсан.
Тэд 286 хоног сансарт өнгөрүүлж, 195 сая км аялж, дэлхийг 4,576 удаа тойрон ниссэн байна.
Анх 2024 оны 6-р сарын 5-нд Boeing Starliner хөлгөөр хөөрсөн ч техник гэмтлийн улмаас төлөвлөсөн хугацаандаа буцаж чадаагүй юм. Эцэст нь НАСА SpaceX компанийн Dragon Freedom сансрын хөлгөөр тэднийг буцаах шийдвэр гаргасан. Флорида мужийн эрэг орчимд далайд газардсан бөгөөд газардсаны дараа багийнхныг Хьюстон дахь НАСА-гийн төвд хүргэж, эрүүл мэндийн үзлэгт оруулжээ.
Микрогравитацийн (татах хүчгүй орчин) нөлөө: Сансарт удаан хугацаагаар байх үед булчин суларч, ясны нягтрал багасч, цусны эргэлт өөрчлөгддөг. Сансрын нисгэгчид “тахианы хөл” (булчин суларснаас хөл нарийсах) болон “нялх хүүхдийн хөл” (улны арьс зөөлрөх) гэх мэт шинж тэмдэг илэрдэг.
45 хоногийн нөхөн сэргээх хөтөлбөр: НАСА тэднийг Хьюстоны сансрын төвд өдөр бүр биеийн тамирын дасгал, булчин сэргээх эмчилгээ хийх хөтөлбөрт хамруулж байна. Урт хугацааны судалгаа нь ясны сийрэгжилт, хэт ягаан туяаны цацрагаас үүдэлтэй эрүүл мэндийн эрсдэлийг тогтоох зорилготой.
Сонирхолтой мэдээлэл: Газардсаны дараа тэдний SpaceX Dragon хөлгийг дельфинүүд хүрээлсэн нь сансрын нисгэгчдэд ховор тохиолдох халуун дулаан угталт болсон. Энэ аялал нь сансрын нисгэгчид ямар их сорилттой тулгардагийг харуулж, тэдний тэвчээр, зохицох чадварыг дахин баталлаа.
Эх сурвалжууд:Wired, New York, Post People
Ч.ДӨЛГӨӨН
