Монгол Улсад орчин цагийн зэвсэгт хүчнийг үүсгэн байгуулсны 104 жилийн ой, “Монгол цэргийн өдөр” өнөөдөр тохиож байна. Монголчуудын энэ өдрийг Цэргийн баяр, Эрэгтэйчүүдийн баяр гэдэг утгаар нь өргөн хүрээнд тэмдэглэн өнгөрүүлдэг болоод байгаа.
Уг өдрийн түүхээс сөхвөл: 1921 оны гуравдугаар сарын 18-нд Их жанжин Д.Сүхбаатарын удирдсан Ардын цэрэг Хиагтыг чөлөөлсөн түүхэн өдөр. Эндээс Монголын орчин цагийн Ардын журамт цэрэг эх орныхоо тусгаар тогтнолын төлөөх анхны ялалтын буухиаг эхлүүлэн Монгол Улсын Зэвсэгт хүчин байгуулагдаж, бахархалт түүхэн замналаа эхлүүлсэн гэж үздэг.
БНМАУ-ын Бага хурлын Тэргүүлэгчдийн 1946 оны тавдугаар сарын 28-ны өдрийн 32 дугаар хурлын тогтоолоор Монгол Ардын журамт цэрэг Хиагтыг чөлөөлж анхны ялалтын тугийг мандуулсан энэхүү түүхт өдрийг “Хувьсгалт цэргийн баярын өдөр” хэмээн жил бүр улс даяар ёслон тэмдэглэх шийдвэр гаргаж байжээ.
Харин 2011 онд Монгол Улсын Их Хурлаас “Нийтээр тэмдэглэх баярын болон тэмдэглэлт өдрүүдийн тухай” хуульд нэмэлт өөрчлөлт оруулснаар жил бүрийн энэ өдрийг “Монгол цэргийн өдөр” болгон тэмдэглэж эхэлсэн билээ.
Хэдийгээр 104 жилийн өмнөх баярыг уламжлан тэмдэглэж буй боловч монгол эрчүүд эрт үеэсээ дайнч байлдаан, дэлхийн талыг эзэлж байсан аугаа түүхтэй гүрний хойч үе тул Монголын зэр зэвсэг, зэвсэгт хүчний түүх олон мянган жилийн өмнөөс эхтэй билээ.
Монголын бүх эрчүүддээ “Монгол цэргийн өдөр”-ийн мэнд дэвшүүлье.
