Тэтгэврийн доод хэмжээг 1.500.000 төгрөг болгохыг шаардаж буй жагсаалыг анх эхлүүлсэн “Монголын ахмадын дуу хоолой хөдөлгөөн”-ий 5 өндөр настан УИХ-ын дарга Н.Учралыг Сэлэнгэ аймагт ард иргэдтэй уулзана гэдгийг сонсоод Улаанбаатар хотоос зорьж очсон байна. Гэтэл уулзалтын үеэр эдгээр ахмадуудын микрофоныг хааж, танхимаас хөөж гаргасан байна.
“Монголын ахмадын дуу хоолой хөдөлгөөн”-ий зохицуулагч, өндөр настан Ц.Алтанзул “Биднийг чимээгүй болчихлоо гэж их ярьж байна. Бид энэ өвөл биеэ эмчлүүлж, гам барилаа. Эрүүл мэнд их доройтсон. Гэсэн ч УИХ-ын даргыг Сэлэнгэд ажиллана гэдгийг сонсоод бид Улаанбаатар хотоос тавуулаа гараад уулзалтыг нь зорьсон. Биднийг үнэхээр тоосонгүй. Миний микрофоныг хаасан, намайг заалнаас гаргасан” гэж гомдоллолоо.
Д.САРУУЛ
