Хавар, намартаа цагаар “оролддог” жишиг бий. Цагийн өөрчлөлт буюу цаг урагшлуулах, хойшлуулах нь хүний бие махбодод дараах сөрөг нөлөө үзүүлдэг.
Нойрны хэмнэл алдагддаг: Биологийн цагийг алдагдуулж, нойргүйдэл үүсгэх нь бий. Нойрны чанар муудаж, сэрэхэд ядарсан мэдрэмж төрнө.
Анхаарал, төвлөрөл буурдаг: Өдөр тутмын анхаарал, төвлөрөл сулрах нь ажлын бүтээмж буурах, авто осол гаргах эрсдэлтэй болгодог. Судалгаагаар цаг урагшилсны дараахан авто ослын тоо нэмэгддэгийг тогтоосон байдаг.
Зүрх, судасны өвчний эрсдэл нэмэгддэг: Цагийн өөрчлөлтийн дараа зүрхний шигдээс, цус харвалт нэмэгдэх магадлалтай гэж судлаачид үздэг. Ялангуяа өндөр настай, зүрх судасны өвчтэй хүмүүст илүү их сөрөг нөлөөтэй.
Дархлаа суларч, сэтгэл санаа тогтворгүй болдог: Биеийн хэмнэл өөрчлөгдөхөд стресс даавар (кортизол) ихэсч, сэтгэл гутрал, сэтгэл санааны тогтворгүй байдал үүсэх магадлалтай. Хүний бие шинэ хуваарьт дасах гэж дархлааны систем суларч, ядаргаа нэмэгдэж болзошгүй.
Биеийн бодисын солилцоонд нөлөөлдөг: Цагийн өөрчлөлт нь бодисын солилцоог удаашруулж, жин нэмэх, чихрийн шижин үүсэх эрсдэлтэй гэж үздэг.
Ч.ДӨЛГӨӨН
